بت من ورق

هوي الحبيب احسن عيونك فتحن ونفض غبار الجامعات الكتحن
عبرات هواك لوسدسدن حلقك تحن لزول سواى ماتنحنحن وانا
اصلي عارفك مابتحن ليه العوينات البريدنك تخونن وتجرحن
بالدموع والنوح مع الناس بتفضحن وانا ديمه بسأل ربي انو
الطالبات يسمحن ويفرحن وبالخير تملى يصبحن ولو في
مشيهن لكلكه يصلحن بس لو ظهر كاشف رقم لا ينجحن
لا يصافحن وهو شنو الفضل في الدنيا عشان الناس تذاكر وتمتحن
بس نبرأ من عيشة الفقر وسمح السكات الفي خشم سيدو وكمان
سمح الصبر ما دام في مدرسه مدرسه واساتذه خصيصين نجاح
وحصص صباح ودرس عصر حنسوى ايه؟ حندق جرس اخر فصل
او ننفصل نتلم نشوف باقي العمر ماهى واضحه زى عين الشمس
واضحه كان هسه وامس واصلى مارق يا ضنى من غنوتى الانا
مدمنه من بلوتى وسلواى انا من قصه لا بتأكلنا عيش لا بتفر جبين
هذا العنا من شدة فارده الارتخاء متمكنه من ممكنه وماممكنه وايه
لزوم يعنى القصيد وكتين تموت العاطفه؟وكتين نعدم فكرتو وحروفو
زاتها نلونها وكتين نقتقت مهجتو وندس عيونو وندفنها ايه لزوم الشعر
الماعرف معناه ولا شيتن عناه؟ ابقي مارق يا جنى كان من هناك
او من هنا كان منهم او مننا من مزامير التوجس والغنا من صباحات
الهواجس ومن طوابير المدارس ومن مروق الروح وامرق من متاهات
النفس ماهى واضحه زى عين الشمس واضحه في كل الجرايد والقصايد
والمعابد والمصانع والشوارع لما دون نشعر نحس لما دون خاطر يمر
واضح انو سكاتو مقدود من دبر وقميصو مقدود من دبر وضميرو
مقدود من دبر وكلامو مقدود من دبر لكن منو البشهد عليك يابت مادام
كلك عزر يابت وكت عرفوك جد بتخافي من ضل الضحى ومن بشرة الناس
السمر ويؤسفنا جدا اننا ويؤسفنا اسود مننا ومحنيه ضهرو من الكبر و بتخافي
من ضل الضحى ومن ضحكة الناس السمر لكن ما اظن انهم فهمو العيون
السمحه فيك كانن شتر ويسلم ضراع الطين وقدح المونه وجيت امونه حر
الوطه وارده صحونها للود البشيل طوريتو سباق الفجر وتضيع سنين العمر
ليه في المدرسه المدرسه الما بتجبر الخاطر اذن المدرسه الما بتستر الحال
بكره ما بتملالنا فت شوال تمر ياخ ايه لزوم يعنى الدفاتر والمحابر والشنط
والارديه والدق ودرس اليوم وحلق الراس وقليم الضفر ايييييك يامدرسه فتيينا
ايه يا مدرسه دى الجامعه لسه فيها ناس بتحب بعض وتلبس بعض تاكل بعض
وتقوم بعض وتنوم بعض ومنو العوض وليه العوض وفي ناس كمان تجمع
ورق فاضى وتمر تنجح فشل تسرق حصاد غيرها وتمر وكتييييير في ناس
بتفط سطر ياشعبي اصحى كفاك شقي وكفاك خطاك علي الجمر لمتين حنحلم
بالغنا لمتين حنعدى من الضياع والفرقه والحرقه ونمر وسمح السكات الفي
خشم سيدو وكمان سمح الصبر والدنيا مازالت بخير والدنيا مازالت فقر وانا
زى دراويش العشق ماسقت خطوات الرحيل لكن مشيتها وبالجبر ومشيت فوق جمر
وحبيبتى قالت لي تعال ومرقت من جلدى القديم ودرعت توب الصبينه ومشيتلها
وانا منتهى سنتين ولا قعدن عيونى مع عيونها اتونسن لا في الخيال لاقيتها
لا لاقتنى هى سنتين ولا بنفدالنا سكه ولا خطانا بتنتهى سنتين وبرغم الابتعاد
والعيشناهو من خوف وارتعاد ولسه سعاد هى بتستحى وانا بشتهى وانا بستحى
وهى بتشتهى وما بين نعم واللقيا كان حرفين نهى وانا خاطرى من كتر الهموم
والساعه خمسه وسهى وفى الهم غرق وبالشوق حرق وحبيبتى قالت لي تعال
خافت وكت قتلها شيخ مسكينه ماعارفه الفرق بي الدراويش والشيوخ بين
الصفيقات والعرق بين الغرق والما غرق اتاريها زينا يا خلق طينه ومطينه
بالعشق ومكتوله لحد السكات ومتيمه بس كنت ديمه بعلمها انو الحزن ذاد ا
لفرح والفرحه زاتها مؤلمه والعافيه اسمح منها لوحتى كانت بلسمها والشمس
في توب من حلال والقمره اكبر مجرمه وكضابه ما بتحلب لبن ومليانه زيف
ومهضلمه وممسوخه مهما اتبرجت مازى مصابيح السماء والقدره ما بتفات شبر
والستره ميها الكمكمه والحلوه ما حلوة طعم والمره ربنا قاسمها والقسمه ما
بالايد كمان والايد هى زاتها مقسمه اصبع كبير واصبع صغير واصبع وسط
واصبع نضم واصبع بدخل خاتمه وتفرق بدايه الشوق كتير وكتين تصل للخاتمه
ما الريده بتشوف بتحت والحب موشح بالعمى وما بفهم النور الا زول عاش في
دياجر مظلمه والنجمه ما بتعنى الوضوح العتمه ميها الهضلمه والوشمه ما نزف
الجروح والبسمه عز البفهمها والنسمه في الصيف لما تبوح تحرق حشا البتنسما
والوجعه بااااااااااااارده علي الببوح وتسل رويحة البكتمها والروح بتمرق ما بتموت
والجثه بتقيم مأتمها ونحن انعكاسات للنجوم والواطه ضل راميهو السما وانا مارميت
اذ رميت واى عاشق مارمى وضحك المشيب برأسي وبكى ونادى سلما وسبا بقاة الطير
حين بكى حزين مرغما وريتها معنى القارعه وعقر وربك دمدما وحفظتها الناس والفلق
والحمدو والاخلاص وطه ولم يكن والعاديات وكأنما ما كانى في شئ وبعد دا كلو
بتنتشى لا بتستحى ولا بتختشي وقرمت كريعيها بالمشى وقتليها اوع تدقشي والطيبه
مافي كل شئ الفيك خليهو فيك جوه والما بخش وما تخششي ودمع الظنون البينى
وبينك قشقشي والشوق على باب البريدك وشوشي ونار النضال جنب الشمس ما تمشى
عليها براك ياروحي هو بتشمسي وكان جاك خريف الوجعه داخلها ابنى وعشعشي
وادينى احساس انى شئ وقرمت كرعيها بالمشى وكلمتها خلي بالك يابنيه العمارات
البناطحن والمعانى القرمزيه اوع تسرق من ملامحك او تغير فيك شويه مانى شايل
هم قرايتك انت قرايه وذكيه ابقي جد يا حلوه فاهمه وابقي واعيه وكونى حيه اصلو في
الجامعه العريضه وفي بيوت الداخليهفي الحبايب وفي القرايب وفي البقاسموك الاسيه الا
برضو خلي بالك هي المصايب مى شويه العقارب والكهارب والعقارب والمصايب والف
سوسه والف حيه وانت سمحه وانت قمحه ولسه نيه ولودقست اسألينى انا الدقس واكلونى
السمسميه في زمنا وحياة عيونك بتفنوك يازوله حيه ابقى واظبي علي صلاتك قومى كل
ما نادى حيى وخلي بالك في الشوارع وفي المسافات القصيه وفي مشاوير العصاري وانت
ساعة المغربيه في الحدائق والكباري والملاهى الاجنبيه والوليدات الاخيرلك من تاصحبيلك
بنيه والبنات البظلتن وشهن والبتعمل فيها شيخه وتقول تشوفلها طيه وفي القرايه سجم رمادن
ابقي مارقه وناقمي لي مره تلقي الضمه شده وتلقي الشده مده وعاادى تلقي الخمسه ميه واسمع اسمع
وياماتسمع في البغنن الله لي وكر علي وجيبوا لي عاد دا كلام ونحن يا حليلنا الغلابه بلعبنبنا
كوعليه ودايره بيرقر ودايره شيه ودايره طرحه وتيكو ملحه ودايره جستى وميج ومسحه
وخصله تايهه وشنطه بطه وعمو اسرع انقبط وزولي نطه ودى المحطه وهنا لقطه وهى
انت هى وتانى هى عندكم كلب ولا اجى بالدرب اطفر ولا بتفر الماف شنو ابوك لا راضى
لا راضي كيسك فاضي ولا نمشى القاضى اشخط شخيط واقيف بعيد وفي النهايه القصه
فكه في الحاضره ادينا فكه ولا حقي حبوبة امى مكه وعامله فيها رشيقه حيه ومهما
نصرخ برضو هى هى وفي البتنسي ابوها يقدح في ضنا ايامو الشقيه عشان هى
تقرأ وبكرة تنجح وتحيا مستوره ورضيه وفي الامهاتن يبكن في وراهن ووووب
وحيه الا هن سجم المحنه حليل زمنكن يالرضيه لا فؤادن في يوم حن لا طرن
بالمره جيه الشفايف مي شفايف والشعر سونلو كيه وبدن الاسكيرت شرطه وتانى
فوق الركبه طيه وبممرقنن واحسن اسكت وشدى حيلك يا بنيه