السامعين عاطف خيري

---

يا السامعين من اجمل ما كتب عاطف خيري

مُساهمة من طرف احمد محمد في الخميس أبريل 29, 2010 6:19 pm
اجمل القصائد تلك التي تكون لسان حال معبر عن الواقع المعاش هذه احدى
القصائد التي عبرت عن هذا الحال



يا السامعين الواقف فيكم والقاعدين اسالو
مرة سايق بيجو ويحرق ساكت في البنزين
طالع فسحة معاهو ولية وجنبو عيالو الشبعانين
هل جربت مرقت الشارع وشفتا العالم كيف عايشين؟
وشفت الشفع في الطرقات البغسلوا في العربات
تلقي الواحد هدمو مشرط ونصو الباقي ملان رقعات
عامل اورنيش شافع يا دوب ما ربى الريش
شايل باغتو وراصي الفيش كش كش اورنيش ورنيش
علشان ايه علشان ما يعيش ناس بتمسح قعر الجزمة
وناس تتمردق فوق النعمة وناس شهرين ماضاقوا اللحمة
وناس ضايعين ما بين الزحمة اسال ديل كيف عايشين
ديل الفطوا فطور الجمعة شان ما ياكلوا غدا الاتنين
يعني الواحد من بطن امو بالعاملنوا فرضتوا عليهو يعيش مسكين؟
يعني الحظ الشال وداك ما بديهو ولو بالدين
يا انسان بين الماضي وحتى الان قصة طويلة بدون عنوان
قصة كتبت فصولا زمان لما بنيت عليت بنيان
لما سرقت حقوق الناس واتعاليت وبقيت تقيان
فكر فكر قلب امر فكر يوم في ظلمة قبرك
كيف ترتاح شبعان في قصرك وراقد تحتك زول جيعان